BK Arena yahakanye igitaramo cya Justin Bieber i Kigali, isaba abantu kwirinda abatekamutwe

 

Ubuyobozi bwa BK Arena bwanyomoje byimazeyo amakuru yari amaze iminsi akwirakwizwa ku mbuga nkoranyambaga avuga ko umuhanzi w’icyamamare ku Isi, Justin Bieber, ategerejwe gutaramira muri iyi nyubako ku wa 23 Gicurasi 2026. Bwavuze ko ayo makuru ari ibihuha bidafite aho bihuriye n’ukuri, bunasaba abantu kwitwararika abatekamutwe bari kuyakwirakwiza bagamije kubashuka.

Ibi byatangajwe binyuze mu itangazo ryashyizwe ku mbuga nkoranyambaga z’iyi nyubako izwiho kwakira ibitaramo bikomeye n’ibikorwa bitandukanye by’imyidagaduro n’imikino. Ubuyobozi bwa BK Arena bwagize buti: “Igitaramo cya Justin Bieber kimaze iminsi cyamamazwa kubera muri BK Arena ni ibihuha. Mwirinde abatekamutwe.”

Aya magambo aje asubiza ku makuru yari amaze gukwirakwira cyane, aho bamwe mu bakoresha imbuga nkoranyambaga basangaga amatangazo yamamaza igitaramo cy’uyu muhanzi, ndetse hari n’amafoto yakozwe mu buryo bwo kureshya abantu, agaragaza ko kizabera i Kigali.

Abari inyuma y’aya makuru y’ibinyoma bari banatangiye gutangaza ibiciro by’amatike byavugwaga ko ari hejuru cyane, aho itike ya make yavugwaga ko igura amadolari 100 (asaga ibihumbi 140 by’amafaranga y’u Rwanda), iya kabiri ikagura 200$ (asaga ibihumbi 280 Frw), mu gihe itike ihenze cyane yavugwaga ko igura 1000$ (asaga miliyoni imwe n’ibihumbi 400 Frw). Ibi byari byateje impagarara n’amatsiko mu bakunzi b’umuziki, benshi bibaza niba koko u Rwanda rugiye kwakira igitaramo cy’umuhanzi mpuzamahanga ku rwego rwo hejuru nka Justin Bieber.

Nubwo byari byatangiye gutuma abantu benshi babyizera, ubuyobozi bwa BK Arena bwahise bubinyomoza, busobanura ko nta gikorwa na kimwe cy’uyu muhanzi giteganyijwe muri iyi nyubako muri icyo gihe cyavuzwe.

Bwanibukije ko ibitaramo byose byemewe kandi byateguwe bibera muri iyi nyubako bitangazwa gusa binyuze ku mbuga nkoranyambaga zayo zemewe, ndetse no ku rubuga bagurishirizaho amatike rwa Ticqet.rw. Bityo, busaba abantu kujya bagenzura neza aho amakuru aturuka mbere yo kuyizera cyangwa kugira icyo bayakoreraho, cyane cyane mu gihe asaba amafaranga.

Iyi nkuru y’ibihuha yagaragaje uburyo abatekamutwe bakoresha amazina y’ibyamamare mu gushuka abantu, cyane cyane mu bihe abantu benshi bashaka kwitabira ibitaramo by’abahanzi mpuzamahanga. Iyo hatangajwe ko umuhanzi ukomeye agiye gutaramira ahantu runaka, bituma abantu benshi bashishikazwa no kugura amatike hakiri kare, bityo bikaba byoroshya ko bashukwa n’ababeshya.

Justin Bieber ni umwe mu bahanzi bakomeye cyane ku Isi, akaba afite abakunzi benshi mu bihugu bitandukanye birimo n’u Rwanda. Azwi cyane mu ndirimbo zakunzwe ku rwego mpuzamahanga zirimo “Sorry”, “Love Yourself” ndetse n’iyo yasubiyemo ya “Despacito” yakoranye na Luis Fonsi na Daddy Yankee.

Uyu muhanzi ukomoka muri Canada, ubu ufite imyaka 31 y’amavuko, yinjiye mu muziki akiri muto cyane, aho yatangiye kumenyekana mu mwaka wa 2007 afite imyaka 13 gusa. Kuva icyo gihe, yagiye akora indirimbo nyinshi zakunzwe, anegukana ibihembo bikomeye mu muziki mpuzamahanga.

Kuba izina rye ryifashishwa mu bikorwa by’uburiganya si ikintu gitangaje, kuko akunzwe cyane kandi abantu benshi bifuza kumubona ataramira imbonankubone. Ibi bituma abatekamutwe babona uburyo bwo gukoresha iryo zina mu gushuka abantu, babizeza ibitaramo bitabaho.

Mu Rwanda, BK Arena ni imwe mu nyubako zigezweho zakira ibitaramo bikomeye, by’umwihariko iby’abahanzi mpuzamahanga n’ab’imbere mu gihugu. Mu bihe byashize, iyi nyubako yakiriye ibitaramo by’abahanzi bakomeye batandukanye, ibintu byatumye abantu batangira kwizera ko ishobora kwakira n’abahanzi ku rwego rwa Justin Bieber.

Icyakora, ubuyobozi bwayo bushimangira ko buri gikorwa cyose gitegurwa kikamenyekana binyuze mu nzira zemewe, bityo abantu bakwiye kwirinda amakuru aturuka ahandi hatizewe.

Ibi bibaye isomo rikomeye ku bakunzi b’imyidagaduro, ribibutsa ko bagomba kujya bagenzura amakuru mbere yo kuyizera, cyane cyane ayajyanye n’amatike y’ibitaramo cyangwa ibindi bikorwa bisaba amafaranga. Kugira amakenga no gukoresha imbuga zizewe ni byo byafasha kwirinda kugwa mu mutego w’abatekamutwe.

Mu gusoza, nubwo abakunzi ba Justin Bieber bashobora kuba bari biteze igitaramo cye i Kigali, byamaze kugaragara ko nta gahunda ihari kugeza ubu. Icyakora, si ukuvuga ko bidashoboka ko mu gihe kiri imbere u Rwanda rushobora kwakira ibitaramo by’abahanzi bakomeye ku rwego mpuzamahanga, kuko urwego rw’imyidagaduro rukomeje gutera imbere umunsi ku wundi.

Abanyarwanda basabwe gukomeza gukurikirana amakuru yizewe atangwa n’inzego zibishinzwe, no kwirinda ababashuka babizeza ibitaramo bitabaho bagamije kubambura amafaranga yabo.

Iyi nkuru yanditswe na kennyeazynew.blogspot.com.