Mu ijoro ryo ku wa 19 Werurwe 2026, umwe mu ba DJ bafite izina rikomeye ku mugabane wa Afurika, Imohiosen Patrick uzwi cyane nka DJ Neptune, yageze mu Rwanda aho aje kwitabira igitaramo gikomeye yise “Soundz of Neptune” kizabera i Kigali.
Uyu muhanzi ukomoka muri Nigeria yakiriwe ku Kibuga Mpuzamahanga cy’Indege cya Kigali n’abakunzi b’umuziki ndetse n’abari mu itsinda riri gutegura iki gitaramo, bamugaragariza ibyishimo byinshi byo kongera kumubona mu Rwanda nyuma y’imyaka igera kuri ine ahaherukaga.
Igitaramo cya “Soundz of Neptune” giteganyijwe kuba ku wa 21 Werurwe 2026, kikazabera muri Atelier du Vin, imwe mu mahoteli n’ahantu h’imyidagaduro hagezweho i Kigali. Abategura iki gitaramo batangaje ko ari igitaramo cyateguwe mu buryo bwihariye, kigamije guha abakunzi b’umuziki ibyishimo n’inararibonye itazibagirana.
Akigera ku kibuga cy’indege, DJ Neptune ntiyahwemye kugaragaza ko yiteguye gutanga ibyishimo bidasanzwe. Mu kiganiro kigufi yagiranye n’itangazamakuru, yongeye gukangurira abakunzi b’umuziki kugura amatike hakiri kare, abizeza ko abazitabira bazabona umuziki uri ku rwego rwo hejuru ndetse n’imyidagaduro itandukanye.
Yagize ati: “Nishimiye kongera kugaruka mu Rwanda. Abanyarwanda baranyereka urukundo rwinshi cyane kandi ndabizeza ko iki gitaramo kizaba ari kimwe mu byiza nigeze gukora. Ntimuzagihombo.”
Si ubwa mbere DJ Neptune agiye gukorera igitaramo gikomeye mu Rwanda, kuko yaherukaga kuhataramira mu mwaka wa 2022. Icyo gihe yakoze igitaramo cyabereye muri BK Arena, cyitabiriwe n’abantu benshi cyane. Icyo gitaramo cyasize amateka akomeye mu mitima y’abakunzi b’umuziki, ndetse kugeza n’ubu kiracyibukwa nk’ikimwe mu byaranze imyidagaduro y’uwo mwaka.
Mu rwego rwo gukomeza kuryoshya igitaramo cye, DJ Neptune aherutse gusangiza abakunzi be amafoto y’icyo gitaramo cyo mu 2022, ayakoresha mu kwamamaza “Soundz of Neptune”. Yagaragaje ko nubwo icyo gitaramo cyari gikomeye, icyo ateganya gukora ubu kizaba kirenze kure ibyo abantu babonye icyo gihe.
Yagize ati: “Amafoto mubona yo mu 2022, nta kintu kiyarimo ugereranyije n’ibyo turi kubategurira ubu.” Aya magambo yakanguye amatsiko menshi mu bakunzi b’umuziki, benshi batangira gutegereza n’amatsiko menshi kureba icyo azabagezaho kuri iyi nshuro.
Iki gitaramo kizahuza DJ Neptune n’abandi ba DJ bazwi cyane mu Rwanda, barimo DJ Marnaud, DJ Ira, DJ Inno na DJ Lou, ndetse n’abandi banyuranye bazafatanya gutuma iryo joro riba iry’imbonekarimwe. Abategura iki gitaramo bavuga ko ari amahirwe akomeye ku bakunzi b’umuziki kubona aba DJ bose ku rubyiniro rumwe.
DJ Neptune ni umwe mu bantu bagize uruhare rukomeye mu guteza imbere umuziki wa Afurika, cyane cyane mu njyana ya Afrobeats. Yatangiye umwuga wo kuvanga imiziki afite imyaka 11 gusa, ibintu byagaragaje impano idasanzwe yari afite kuva akiri muto.
Mu mwaka wa 2001 ni bwo yatangiye kuwukora kinyamwuga, bivuze ko ubu amaze imyaka 25 mu muziki. Ibi ni byo biri gutuma uru rugendo rwe rwo kuza mu Rwanda rufite n’indi ntego yo kwizihiza isabukuru y’imyaka 25 amaze akora umuziki.
Mu myaka amaze mu muziki, DJ Neptune yakoranye n’abahanzi bakomeye bo ku mugabane wa Afurika no ku rwego mpuzamahanga. Mu ndirimbo ze zamenyekanye cyane harimo “So Nice”, “Baddest”, “Marry”, “Wait” ndetse na “Demo”, zose zakunzwe cyane mu bihugu bitandukanye.
By’umwihariko, DJ Neptune yanakoranye n’abahanzi bo mu Rwanda, ibintu byatumye arushaho kugirana umubano mwiza n’Abanyarwanda. Mu ndirimbo “No One” yakoranye na Kenny Sol, yagaragaje uburyo ashobora guhuza injyana zitandukanye akazivangamo ubuhanga. Yongeye no gukorana na Bruce Melodie mu ndirimbo “Forever” bahuriyemo n’umuhanzi Bayanni, indirimbo na yo yakunzwe cyane.
Abakunzi b’umuziki bavuga ko kuba DJ Neptune agarutse mu Rwanda ari amahirwe akomeye yo kongera kwishimira umuziki we imbonankubone, cyane ko azwiho gukora ibitaramo bishyushye kandi byuzuye udushya twinshi.
Ku rundi ruhande, abategura igitaramo cya “Soundz of Neptune” batangaje ko imyiteguro igeze kure, ndetse ko hazakoreshwa ibikoresho bigezweho mu majwi n’amatara, kugira ngo abazitabira babone ubunararibonye budasanzwe.
Biteganyijwe ko abazitabira bazishimira uruvange rw’indirimbo zitandukanye, harimo izigezweho ndetse n’izakunzwe mu myaka yashize, byose bivanzwe mu buryo bwihariye bwa DJ Neptune.
Mu gihe hasigaye iminsi mike ngo igitaramo kibe, abakunzi b’umuziki bakomeje kugaragaza amatsiko menshi, benshi bakaba bamaze kugura amatike hakiri kare. Hari icyizere ko kizitabirwa ku bwinshi, cyane ko DJ Neptune afite abakunzi benshi mu Rwanda no mu karere.
Muri rusange, uku kuza kwa DJ Neptune mu Rwanda ni ikimenyetso cy’uko igihugu gikomeje kuba isoko rikomeye ry’imyidagaduro ku mugabane wa Afurika, ndetse n’aho abahanzi mpuzamahanga bifuza kuza kwigaragaza.
Igitaramo cya “Soundz of Neptune” kiritezweho kuba kimwe mu bizagaragaza ko umuziki ari ururimi ruhuza abantu bose, rudasaba gusobanura byinshi, ahubwo rugasaba kuwumva no kuwishimira.
Abazitabira bazagira amahirwe yo kwibonera imbonankubone ubuhanga bwa DJ Neptune, ndetse banishimane n’abandi ba DJ b’abahanga bazaba bari kumwe kuri uwo munsi.
Icyo bisaba ni ukugura itike hakiri kare, kugira ngo hatagira uzasigara inyuma kuri uyu munsi utegerejwe na benshi. Nk’uko DJ Neptune ubwe yabivuze, ibyateguwe birenze kure ibyo abantu babonye mbere, bityo buri wese ariteguye gutaha anyuzwe.
Iyi nkuru yanditswe na kennyeazynew.blogspot.com
.jfif)
0 Comments