Doja Cat yanyuze abafana i Pretoria, Se Dumisani Dlamini agaragara mu gitaramo nyuma y’impaka ku mbuga nkoranyambaga

 Iyi nkuru yanditswe na kennyeazynew.blogspot.com

Umuhanzikazi mpuzamahanga Doja Cat yongeye kugaragaza imbaraga, ubuhanga n’igikundiro cye ku rubyiniro, ubwo yataramiraga mu gitaramo gikomeye cyabereye i Pretoria muri Afurika y’Epfo, nyuma y’iminsi mike gusa avuye gutaramira i Kigali mu Rwanda. Ni igitaramo cyabaye mu ijoro ryo ku wa Gatanu tariki 20 Werurwe 2026, kibera muri SunBet Arena, aho yakiriwe n’ibihumbi by’abafana bari baje kwihera ijisho umwe mu bahanzi bagezweho ku Isi muri iki gihe.

Iki gitaramo cyari gikurikiye icyo Doja Cat yakoreye i Kigali ku wa 17 Werurwe 2026 muri BK Arena, mu iserukiramuco rya Move Afrika ritegurwa n’umuryango Global Citizen. Ibi bitaramo byombi byari bigamije guteza imbere ubukungu bushingiye ku buhanzi no gushyigikira gahunda zitandukanye z’iterambere ku mugabane wa Afurika.

Mu gitaramo cya Pretoria, Doja Cat yagaragaye mu myambaro imenyereweho igaragaza imiterere ye idasanzwe ku rubyiniro, aho akunze kugaragaza ubuhanzi buvanga umuziki, imbyino n’imyambarire itangaje. Yaririmbye zimwe mu ndirimbo ze zakunzwe ku rwego mpuzamahanga zirimo “Juicy” ndetse na “Paint the Town Red”, ibintu byatumye abafana be banyurwa bikomeye, baririmba banabyina buri jambo.

Iki gitaramo cyabaye umwihariko kuri Doja Cat, cyane ko gifitanye isano n’inkomoko ye. Nubwo yavukiye muri Leta Zunze Ubumwe za Amerika, se akomoka muri Afurika y’Epfo, ibintu uyu muhanzikazi akunze kugarukaho iyo ari gutaramira ku mugabane wa Afurika. Ubwo yari ku rubyiniro, yagize ati: “Ahantu ntari narigeze ngera, ariko numva ari nko mu rugo. Ibyo ni byo bituma Afurika y’Epfo iba idasanzwe.” Aya magambo yakiriwe n’amashyi menshi y’abafana, bagaragaza ko bamwishimiye nk’umwana wabo wagarutse mu rugo.

Mbere y’iki gitaramo ariko, Doja Cat yari yavugishije benshi ku mbuga nkoranyambaga, cyane cyane ku rubuga rwa TikTok, aho yashyize amashusho avuga ku mibanire ye na se, Dumisani Dlamini. Mu buryo bwo gusetsa no gukabya, yavuze ko yavuganaga na se uri muri Afurika y’Epfo, amubwira ko atabashije kwitabira igitaramo cye kuko atamwandikira kenshi cyangwa ngo amuhamagare kuri WhatsApp.

Yagize ati mu buryo bwo gusetsa, ko yahise amwoherereza uburyo ashobora kugura itike, amusaba kuyifungura kuko ari bwo buryo bworoshye bwo kubona aho kwinjirira mu gitaramo cye. Aya magambo yavuzwe mu rwenya, ariko akwirakwira cyane ku mbuga nkoranyambaga, bamwe babifata nk’urwenya rusanzwe, abandi babyibonamo ubutumwa bukomeye ku mubano wabo.

Bamwe mu banya-Afurika y’Epfo bagaragaje ko batishimiye kuba se wa Doja Cat ataragaragaye mu gitaramo cya Kigali, ndetse bavuga ko byari bikwiye ko ajya gushyigikira umukobwa we mu bitaramo bye ku mugabane avukamo. Hari abavuze ko bitumvikana uburyo atafashe indege ngo ajye kumushyigikira, cyane ko ari umwe mu bahanzi bakomeye ku Isi.

Nyuma y’ibi byose ariko, abantu batunguwe n’amashusho yakwirakwiriye ku mbuga nkoranyambaga agaragaza Dumisani Dlamini yitabiriye igitaramo cy’umukobwa we i Pretoria. Aya mashusho yaciye ibintu, benshi bavuga ko bishimishije kubona umubyeyi ashyigikira umwana we ku rubyiniro, cyane cyane mu gihugu akomokamo.

Ibi byahinduye isura y’ibiganiro ku mbuga nkoranyambaga, aho bamwe bavuze ko amagambo Doja Cat yavugiye kuri TikTok yari agamije gusetsa gusa, atari ukuvuga ko umubano wabo umeze nabi. Nk’uko asanzwe abigenza, Doja Cat akunze kuvanga ubuzima bwe bwite n’urwenya, bigatuma ahora avugisha benshi.

Uretse ibyo bijyanye n’umuryango we, Doja Cat ni umwe mu bahanzi bafite inkuru yihariye y’urugendo rwabo mu muziki. Yavutse yitwa Amala Ratna Zandile Dlamini ku wa 21 Ukwakira 1995, avukira i Los Angeles muri Leta Zunze Ubumwe za Amerika. Afite inkomoko ihuza Amerika na Afurika y’Epfo, ibintu byamugize umuhanzi ufite umwihariko mu kumva no guhuza imico itandukanye.

Yatangiye kugaragaza impano mu mbyino no kuririmba akiri muto, aza gutangira gushyira indirimbo ze ku rubuga rwa SoundCloud. Indirimbo ye ya mbere yamufashije kumenyekana ni “So High” yasohoye mu 2013, yamuhesheje gusinyana amasezerano n’inzu ifasha abahanzi ya RCA Records. Gusa izina rye ryaje kwamamara cyane mu 2018 ubwo yasohoraga indirimbo “Mooo!” yakwirakwiye cyane ku mbuga nkoranyambaga kubera amashusho yayo atangaje.

Mu 2019 yasohoye album “Hot Pink” yamufashije gukomeza kuzamuka ku rwego mpuzamahanga, by’umwihariko indirimbo “Say So” yamugejeje ku mwanya wa mbere ku rutonde rwa Billboard Hot 100. Nyuma yaho yakomeje gusohora indirimbo n’album zakunzwe zirimo n’izo yaririmbye mu bitaramo bye bya Move Afrika 2026.

Mu rugendo rwe, Doja Cat yagiye yegukana ibihembo bitandukanye birimo na Grammy Awards, ibintu byamushyize mu cyiciro cy’abahanzi bakomeye kandi bafite ijambo rikomeye mu muziki wa Pop na Hip-Hop ku Isi.

Ibitaramo bye i Kigali no i Pretoria byashimangiye ko afite igikundiro gikomeye ku mugabane wa Afurika no ku Isi muri rusange. Kuba yaravuze ko yumva Afurika y’Epfo ari nko mu rugo, byakoze ku mitima ya benshi, cyane cyane abamubona nk’umuhanzi ugaruka ku nkomoko ye.

Muri rusange, nubwo habayeho impaka ku magambo yavugiye ku mbuga nkoranyambaga ku bijyanye na se, amashusho yamugaragaje mu gitaramo cye i Pretoria yagaragaje ko hari umunezero n’ubwiyunge. Ibi byatumye benshi basoza bavuga ko umuziki ari wo uhuza abantu kurusha ibindi byose.

Doja Cat akomeje kugaragaza ko ari umuhanzi uzi gutungura no gushimisha abafana be, haba mu ndirimbo, ku rubyiniro no mu buryo atanga ubutumwa bwe ku mbuga nkoranyambaga. Ibitaramo bya Move Afrika 2026 bizasigara mu mateka ye nk’ibihe byamuhuje n’umugabane akomokaho, ndetse bikomeza kubaka izina rye nk’umwe mu bahanzi bafite igikundiro gikomeye ku Isi.