Maître Gims ari mu iperereza rikomeye ku byaha by’iyezandonke mu Bufaransa

 Maître Gims ari mu iperereza rikomeye ku byaha by’iyezandonke mu Bufaransa

🎤 Maître Gims ari mu iperereza ku byaha by’iyezandonke mu Bufaransa

Umuraperi ukomeye mu Bufaransa Gandhi Djuna wamamaye nka Maître Gims ari mu bihe bitoroshye nyuma yo kwisanga mu iperereza rikomeye rijyanye n’iyezandonke n’ikorwa ry’imari rikekwaho kuba ryarashyigikiye umutwe w’abagizi ba nabi.

Uyu muhanzi ufite inkomoko muri Repubulika Iharanira Demokarasi ya Congo (RDC) yafashwe ku wa 25 Werurwe 2026 akigera ku kibuga cy’indege cya Paris-Charles de Gaulle, akurikiranwa n’inzego zishinzwe kurwanya uburiganya mu by’imari.

Ibyaha akurikiranyweho n’uko dosiye ihagaze

Amakuru aturuka mu nzego z’ubutabera mu Bufaransa agaragaza ko Gims akurikiranyweho ibyaha birimo iyezandonke no kuba yaragize uruhare mu gutera inkunga ihuriro ry’abantu bakekwaho ibikorwa byambukiranya imipaka binyuranyije n’amategeko.

Yafunzwe amasaha 48 mbere yo kurekurwa by’agateganyo, ariko ashyirwa mu buryo buzwi nka judicial supervision. Ubu buryo busobanuye ko nubwo arekuwe, agomba kubahiriza amabwiriza akomeye arimo kutava mu gihugu atabiherewe uburenganzira, kwitaba inzego z’ubutabera igihe cyose ahamagawe no kutegera abantu cyangwa ibikorwa bifitanye isano n’iperereza.

Iperereza rikorwa ku bufatanye n’inzego zirimo Office National Anti-Fraude (ONAF) ndetse n’ubushinjacyaha bukurikirana ibyaha by’imitwe iteguwe buzwi nka Parquet National Anti-Criminalité Organisée (Pnaco). Amakuru avuga ko dosiye yatangiye gukorwaho iperereza kuva mu 2023.

Ibyo akekwaho mu mishinga y’imitungo

Mu byo iperereza rishingiyeho harimo gukeka ko amafaranga akomoka ku bikorwa bitemewe yashorwaga mu mitungo itimukanwa mu bihugu bitandukanye hagamijwe guhisha inkomoko yayo.

Haravugwa umushinga munini w’imiturire uri mu majyepfo ya Marrakech muri Morocco, uzwi nka Sunset Village Private Residences, watangijwe mu 2025. Uwo mushinga uteganya kubakwamo inzu zihenze zirenga 100, zubatse hafi y’ikiyaga kinini cyakozwe mu buryo bw’ubukorano (lagoon).

Maître Gims yagiye agaragara mu bikorwa byo kwamamaza uwo mushinga, ibintu byatumye amazina ye agarukwaho cyane muri iyi dosiye.

Ingaruka ku izina rye mu muziki

Kwisanga muri dosiye nk’iyi bishobora kugira ingaruka zikomeye ku isura n’izina rye mu muziki. Mu 2025, yari umwe mu bahanzi bagurishije cyane mu Bufaransa, ibintu byamushyize ku isonga mu muziki wa rap na Afro-pop w’igifaransa.

Uyu muhanzi yavukiye i Kinshasa mu 1986, aza kwimukira mu Bufaransa akiri muto. Yakuriye mu buzima butoroshye i Paris mbere yo kwinjira mu itsinda rya hip-hop rizwi nka Sexion d'Assaut, ryamuhesheje izina rikomeye ku isoko ry’umuziki.

Mu 2013 yasohoye album ye ya mbere yise Subliminal, yamuhesheje kwamamara ku rwego mpuzamahanga. Indirimbo nka “Bella” na “J’me tire” zamugejeje ku rwego rwo hejuru, zikundwa cyane ku maradiyo no ku mbuga nkoranyambaga.

Nyuma yaho yakomeje gusohora album zakunzwe zirimo Mon cœur avait raison (2015) na Ceinture noire (2018), zose zageze ku myanya ya mbere ku rutonde rw’umuziki mu Bufaransa no mu Bubiligi.

Yanakoranye n’abahanzi mpuzamahanga barimo Sia, Pitbull, Lil Wayne ndetse na Stromae, ibintu byamufashije kwagura isoko rye ku rwego rw’Isi.

Urubanza rufatwa nk’urukomeye mu Bufaransa

Amakuru akomeza agaragaza ko iri huriro ry’abantu rikekwaho iyezandonke rifitanye isano n’ibigo birenga 2,000 byanditswe mu Bufaransa, bigatuma uru rubanza rufatwa nk’imwe mu manza zikomeye z’imari igihugu cyahuye na zo mu myaka ya vuba.

Kugeza ubu, Maître Gims aracyafatwa nk’utari wahamwa n’icyaha, iperereza rikaba rigikomeje. Icyemezo cya nyuma kizafatwa n’ubutabera nyuma yo gusesengura ibimenyetso byose.