KENNY EAZY

 

DJ Lamper yizihije umwaka umwe w’ibitaramo bya ‘Atmosfera’ mu gitaramo cyabereye muri Camp Kigali

Mu ijoro ryo ku wa 28 Werurwe 2026, muri Camp Kigali habereye igitaramo gikomeye cyari kigamije kwizihiza umwaka umwe w’ibitaramo ngarukakwezi byiswe ‘Atmosfera’, byatangijwe kandi bigategurwa na DJ Lamper. Ni ibirori byitabiriwe ku bwinshi n’abakunzi b’umuziki batandukanye, byagaragaje urwego ibi bitaramo bimaze kugeraho mu kuzamura imyidagaduro yo mu Mujyi wa Kigali.

Iki gitaramo cyatangiye Saa Moya n’Igice z’ijoro, aho abakunzi b’umuziki batangiye kwinjira ari nako bishimira imiziki yavangwaga n’aba-DJ bakizamuka bahawe umwanya wo kubanza ku rubyiniro. Byari uburyo bwiza bwo guha amahirwe impano nshya, ndetse no gushyushya ikirere mbere y’uko abakomeye bafata umwanya.

Ahagana Saa Tatu z’ijoro, DJ Sonia yageze ku rubyiniro asanganirwa amashyi menshi n’abari bamaze kuzura Camp Kigali. Azwiho imbaraga n’imyambarire idasanzwe ku rubyiniro, DJ Sonia yari kumwe n’itsinda ry’ababyinnyi bamufashaga gushyushya abafana. Yacuranze indirimbo zitandukanye zirimo izo mu njyana ya Afrobeat, Amapiano na 3Step, injyana zikunzwe cyane muri iki gihe haba muri Afurika no ku Isi muri rusange. Yari afashijwe na Zuba Mutesi wari MC w’iki gitaramo, wafashaga guhuza abahanzi n’abitabiriye ibirori.

Nyuma y’iminota irenga 60 DJ Sonia amaze ku rubyiniro, hakurikiyeho DJ Lamper ubwe, watangije kandi utegura ibi bitaramo bya ‘Atmosfera’. DJ Lamper azwiho kuvanga imiziki yiganjemo iyo muri Afurika, akayihuza n’iyo mu Rwanda harimo n’indirimbo za gakondo, ibintu bituma ibitaramo bye birangwa n’udushya n’umwimerere.

Mu gihe kirenga isaha yamaze ku rubyiniro, DJ Lamper yerekanye ubunararibonye amaze kugira mu myaka irenga icumi amaze mu mwuga wo kuvanga imiziki. Yashimishije abari bitabiriye iki gitaramo, agaragaza ko ‘Atmosfera’ atari igitaramo gisanzwe, ahubwo ari urubuga rwo guteza imbere umuziki no guhuza abakunzi bawo.

Umushyitsi mukuru w’icyo gitaramo yari Dlala Thukzin, umwe mu ba-DJ bazwi cyane muri Afurika y’Epfo, wubatse izina mu njyana ya Amapiano. Yageze ku rubyiniro ahagana Saa Tanu z’ijoro, asimbura DJ Lamper, atangira gucuranga indirimbo zakiriwe neza n’abafana bari bakumbuye kumva umuziki w’Amapiano uvuye ku rwego mpuzamahanga.

Mu isaha n’igice yamaze ku rubyiniro, Dlala Thukzin yatanze ibyishimo ku bari bitabiriye igitaramo, abereka ubuhanga bwe mu kuvanga imiziki no gutuma abantu barushaho kuryoherwa n’ijoro. Abari muri Camp Kigali bagaragazaga ibyishimo binyuze mu kubyina no kuririmba, mu gihe umuziki wari wumvikana mu buryo bugezweho.

Ahagana Saa Sita z’ijoro, igitaramo cyashyizweho akadomo, benshi bagaragaza ko banyuzwe n’uko umwaka umwe wa ‘Atmosfera’ wizihijwe mu buryo bwihariye. Byari ibirori byasize isura nziza ku myidagaduro yo mu Rwanda, cyane ko byitabiriwe n’abantu b’ingeri zitandukanye barimo urubyiruko n’abakuze.

Mu Werurwe 2025 ni bwo Eric Livio Lamperti, wamamaye nka DJ Lamper, yatangije ibi bitaramo bya ‘Atmosfera’ bigamije kuba ngarukakwezi. Intego ye yari iyo kuzana umwuka mushya mu myidagaduro yo mu Rwanda, by’umwihariko mu mujyi wa Kigali, no guha abakunzi b’umuziki urubuga ruhoraho bahuriraho.

DJ Lamper yatangiye umwuga wo kuvanga imiziki mu 2014 mu Butaliyani aho yakuriye. Yatangiye acuranga mu kabyiniro kazwi nka Latin Club of Milan, aho yagiye yubaka izina buhoro buhoro. Mu 2018 yarangije Kaminuza mu bijyanye n’Ubukerarugendo, ariko ahitamo gukomeza gukurikirana impano ye yo kuvanga imiziki.

Kuva icyo gihe, yakomeje gutaramira ahantu hatandukanye mu Mujyi wa Milan, akorana n’abahanzi n’aba-DJ batandukanye. Mu 2023 yafashe icyemezo cyo kwimukira mu Rwanda, igihugu umwe mu babyeyi be akomokamo, kugira ngo akomereze ibikorwa bye hano ndetse anagira uruhare mu kuzamura urwego rw’imyidagaduro.

Uko iminsi igenda ishira, ‘Atmosfera’ igenda irushaho kuba igitaramo gikomeye gihuza aba-DJ bo mu Rwanda n’abaturutse mu mahanga. Ibi bigaragaza ko u Rwanda rukomeje kuba igicumbi cy’ibikorwa by’imyidagaduro byo ku rwego mpuzamahanga.

Igitaramo cyo kwizihiza umwaka umwe wa ‘Atmosfera’ cyabaye ikimenyetso cy’uko DJ Lamper afite intego yo gukomeza guteza imbere uru rubuga, agaha amahirwe impano nshya kandi akazana n’abahanzi mpuzamahanga. Abakunzi b’umuziki bakomeje gutegereza ibindi bitaramo bizakurikiraho, mu gihe ‘Atmosfera’ ikomeje kwiyubaka nk’imwe mu nkingi z’imyidagaduro igezweho mu Rwanda